Kandidati i PDK-së për kryeministër Bedri Hamza është shprehur optimist për rezultatin e zgjedhjeve të 9 shkurti. Ai është shprehur i bindur se në këto zgjedhje PDK-ja do të jetë parti fituese.

Në një intervistë për gazetën Nacionale, Hamza ka treguar se këtë bindje e ka fituar në takimet që ka pasur me qytetarët nëpër qytete dhe fshatra të ndryshme të Kosovës.

“Ka një disponim që të ketë përkrahje në dobi të PDK-së dhe të marrin një rezultat, i cili na mundëson me e udhëheq Qeverinë. Jam i bindur se do ta udhëheqim Kosovën në katër vitet e ardhshme”, ka thënë Hamza.

Ai ka bërë një krahasim me vitin 2021, kur në zgjedhjet lokale për kryetar të Mitrovicës e kishte mposhtur në raundin e parë kandidatin e VV-së, i cili përkrahej fuqishëm nga kryeministri Albin Kurti dhe kabineti i tij.

Hamza ka bërë me dije se i njëjti optimizëm po vërehet edhe tani.

“Duke e parë atmosferën, në një fazë të zhvillimit të fushatës kam qenë i sigurt se do të fitoja në raundin e parë. U jam shumë mirënjohës qytetarëve të Mitrovicës, me kanë bërë nder të madh. Pas një periudhe të gjatë kohore, jam i vetmi kandidat që kam fituar në raundin e parë, pa balotazh. Në të ardhmen, nuk e di qysh do të jetë. Mirëpo, po e vërej se një atmosferë e tillë pozitive, me ata që i takoj, po vërehet sërish. Kjo na jep optimizëm se më 9 shkurt kemi me pasë rezultat të mirë”, ka thënë Hamza.

Ndër të tjera, Hamza ka elaburuar programin e tij politik.

Ai ka vlerësuar se programi i tij është real dhe i realizueshëm.

Hamza është zotuar se pagat dhe pensionet do t’i rris qysh në vitin e parë të qeverisjes së tij.

Nëse një gjë e tillë nuk do të ndodh, ka thënë ai, do të largohet nga Zyra e Kryeministri.

“Unë nuk e shoh rritjen e buxhetit përmes rritjes se taksave. Rritjen e buxhetore e shoh përmes rritjes ekonomike. Kur të kemi një rritje ekonomike, domethënë përmirësim të standardit të jetesës dhe pagave në sektorin privat, gjithsesi se do të këtë edhe në sektorin publik. Këtë premtim kam me e përmbush në fillim të mandatit. Nëse nuk përmbushet premtimi për rritjen e pagave në fillim të mandatit, sigurisht se nuk me zë viti i dytë në qeveri”, ka thënë Hamza.

Në vlerësimin e tij, Qeveria Kurti është qeveri që nuk ka shënuar ndonjë rezultat në këto katër vite.

Sipas tij, të gjitha qeveritë tjera kanë qenë më të suksesshme.

“Jam i sigurt se Kosova mundet edhe më mirë. Viteve të fundit nuk ka pasur ndonjë progres, në raport më mundësonte. Jo me nevojat, por me mundësitë. Nëse e definoj Qeverinë(Kurti) shkurt, është një qeveria pa rezultate, pa ndonjë projekt domethënës kapital. Me e fillu dhe me e përfundu mandati pa e nis dhe pa e përfundu një projekt të rëndësisë së madhe kapitale, kjo nuk ka ndodhur në të kaluarën”, është shprehur Hamza.

Në këtë intervistë, ai ka folur edhe për përgatitjet që PDK-ja ka bërë për fillimin e fushatës zgjedhore dhe për fillimin e procesit të votimit në diasporë.

Kandidati i PDK-së për kryeministër është shprehur optimist edhe për rezultatin që kjo parti do të marrë në diasporë.

“I ftoj dhe i lus që ta kryejnë këtë obligim dhe ta shfrytëzojnë këtë të drejtë dhe të votojnë sipas bindjeve të tyre politike”, ka thënë ai.

Sipas Hamzës, PDK-ja do të këtë rritje të jashtëzakonshme në diasporë.

“Në bazë të vizitave që kam pasur në diasporë pres rezultat të mirë për PDK-në. Duke u bazuar në takimet që kam pasur në diaspora, ku kam takua mijëra njerëz dhe sigurisht se është një organizim tjetër, pres që PDK-ja të këtë një rezultat jashtëzakonisht të mirë në diasporë”, ka thënë ai, duke shtuar se situata ka ndryshuar nga vitit 2021.

“Sigurisht se nuk është ajo situatë dhe PDK-ja do të këtë një rritje të madhe në diasporë”, është shprehur Hamza.